Komuhakan Upko Ranau mokianu potimpoonon i Dompok om Ewon
February, 17, 2008 (Source: Daily Express)

RANAU: Mokianu o Tinimungan Komuhakan Upko P179 Ranau om sumokodung tavavakas mooi do potimpoonon mingkakat doid pomihian tagazp ko-12 diti id uvang tososondii i polosidin do paati nokomoi, i Tan Sri Bernard Dompok om i Timbang Polosidin dino, i Datuk Dr Ewon Ebin.

Tan Sri Dompok, isido ponogi i Montili Id Koupisan Huguan Montili, nopo nga Hahansanon Parlimen montok P179 Ranau, naamot di Datuk Ewon nopo nga Puu Hintuun Koundangan Pogun (Adun) montok uvang N31 Paginatan, i tososondii nakahantoi doid pomihian tagazo 2004 id tikit do BN Upko.

Minoboos i Poniikon Popisamo Tinimnugan Komuhakan Upko P179 Ranau, i Japirin Sahadi, i ponogi Monunuat Pulitik di Datuk Ewon, diti di kahapas pinapaanjul pitimbungakan do tinimungan nokomoi id upis Pionitan Parlimen Ranau, somok doiti.

Tumanud disido, potindugu ohou o tinimungan nokomoi do mokianu (miampai nunu nopo lahan) do popotindooi duuduvo buuan nokomoi (Dompok om Ewon) so potimpoonon sabaagi mingkakat id uvang dioho tososondii tu ktoinaan, sokodung om kopokionuan dioho nopo nga pokionuon kozo montok kotihombusan kotundaan di au po nopongo.

Ka disido, sokodung do duuduvo buuan diti nopo nga pointahang kozo om noikot vinasi doid kotundaan id songovian do uvang om tuhun mogigizon Ranau, id po’oompus pangan pinomolintaan do kopolintaan Barisan Nasional (BN) di nakatahib. “Mimang zikoi dioho do potimpoonon sabaagi mingkakat,” ka disido.

Pinusou om vinakas kalaja do duuduvo buuan dutu nopo nga i tavasi no kozo om noikot pinantod.

Koimauan di Dompok sabaai Montili Pisompuuvan nopo nga pointahang do ogumu kozo kinoponokodungan kumaa doid kotundaan do tuhun mogigizon, uvang Ranau om pogun Sabah id songovian, ka vagu di Japirin.

Pinopoboos nogi o tinimungan nokomoi do sokodung di au abaagi montok iisai noopo o mingkakat do BN i opihi do huguan buuan takavas do paati montok monongkihavan do touvi id sunduvan om prinsip do BN.

Poingkuo po nga poimpantod o tinimungan nokomoi montok tumihombus popotindooi do duuduvo mingkakat nokomoi do monongkibai id uvang tososondii tu kivaa do tu kivaa kaka do kuminam lobi mooi do poonjulon kosimbanon do mingkakat om uvang monongkihavan id pomihian tagazo do touvi.

Okon ko songkuo nogi kozo tokou miampai do iisai Mingkakat BN di opihi nga mositi tkou do soovon do sokio nung i Dompok do uvang, manaak tanda iho do layat id Ranau do agazo kolugian tu atagakan songuhun buuan di kivaa koimauan do Montili Pisompuuvan di pointantu no do kaanu manaak soibu iso kavo kotundaan, ka di Japirin.

Ontok ponogi diho, nokotounda no poimponu o tinimungan nokomoi montok mindau id ganan do papapanau kimpin montok mongiho kozo do kahantazan tagazo kumaa di mingkakat ngaavi BN i monongkihavan id savi avi uvang Parlimen om Adun uvang Ranau.